सन्तोषकुमार गुप्ता, दर्भान (प्यूठान) १६ पुस ।।

      गुरुङ्ग समुदायहरुको महान् चार्ड २५९९ औँ तमुल्होसार प्रल्हो(महोत्सव) पर्वको अवसरमा बुधबार प्यूठानको बाङ्गेसाल—६ दर्भानमा विविध खेलकुद प्रतियोगिताका साथमा मौलिक सांस्कृतिक कार्यक्रम सम्पन्न भएको छ ।

      गुरुङ्ग राष्ट्रिय परिषद् बाङ्गेसाल प्यूठानको आयोजनामा गुरुङ्ग समुदायको पौराणिक तथा मौलिक संस्कृति अन्र्तगत घाटु नाच, सालैजो, कौडा, टप्पा लगायतका मौलिक संस्कृति झल्कने सांस्कृतिक प्रस्तुति देखाईएको थियो । परिषद्का बाङ्गेसाल कोषाध्यक्ष एकबहादुर गुरुङ्गको अध्यक्षता एवम् बाङ्गेसाल गाविस सचिव मुक्ति खनालको प्रमुख आतिथ्यमा भएको कार्यक्रममा दर्जनौ सांस्कृतिक प्रस्तुतिहरु देखाएका थिए । 

सो अवसरमा आयोजित ५ किलो मिटर मेराथुन दौड प्रतियोगितामा तुलसीराम राना प्रथम, कमल खत्री द्धितीय, युवराज सुनार तृतीय भएका थिए । त्यसैगरी सेलो फाल्ने प्रतियोगितामा केशव गुरुङ्ग प्रथम। मोहन सारु द्धितीय र सोनु गुरुङ्ग तूतीय भएका छन् भने महिला घैँटा फोहर प्रतियोगितामा माया गुरुङ्ग बिजय भएकी छिन् ।

 कार्यक्रममा प्यूठानको बाङ्गेसाल, ठुङ्गेगढी, तिराम, पकला, हंसपुर, दाङ्गको लालमटिया, सिसहनियाँ र अर्घाखँची जिल्लाको जलुके, सिधघाराबाट हजारौँ दर्शकको सहभागिता रहेको थियो ।